Прелесна победа на Нант, Данкерк недостоен ривал за Куп-победникот

Нант – Данкерк 31:15 (17:8)

Ракометарите на Нант ја забележаа третата победа по ред во вториот дел на сезоната, откако во првиот натпревар од вториот дел на францускиот шампионат ја декласираа екипата на Данкерк со 31:15 (17:8). Кирил Лазаров не настапи заради повредата, чие што лечење влегува во завршна фаза. Пред дуелот со ППД Загреб во Лигата на шампионите, момците на Тјери Анти не се ни испотија и забележаа една од најубедливите победи во францускиот шампионат сезонава.

Од првата до последната минута Нант доминираше, брзо се одлепи на +5, па +8, за на полувреме да замине со високи 17:8. Иако Анти ги ротираше ракометарите, сепак нивото не падна во второто полувреме и Нант дојде до лесни бодови..

Најефикасни поединци во победничкиот тим беа Белегер со седум, Еспен Ли Хансен со пет и Турне со четири гола, а кај поразениот Данкерк се истакна Лангаро со шест гола. Одличен на голот на Нант беше Думулин со 17 интервенции.

Нант со оваа победа дојде до 19 бода и се искачи на петтото место, веднаш зад Сант Рафаел и Ним.