Нант ја загуби драмата против Екс Прованс, следи голема битка за второто место
Нант - Екс Прованс 25:26 (10:13)
По исцрпувачкиот ритам на натпревари на четири фронта, Нант западна во мал кризен период и го запиша вториот последователен пораз неделава. Во првиот дуел од 24. коло екипата на Алберто Ентрериос на домашен терен загуби ид директниот конкурент за место во евро-куповите, Екс Прованс со 25:26. Со оваа победа екипата на Тјери Анти се доближи на само еден бод до Нант во битката за втората позиција зад неприкосновениот ПСЖ.
Кирил Лазаров заради повреда не настапи, а Нант го ловеше водството на гостите во текот на целиот натпревар. Шпанецот Тарафета и поранешниот француски репрезентативец Акамбре со пет, односно четири погодоци беа најефикасни во победничкиот табор, а се истакна и голманот на француската селекција. Весли Пардин со тринаесет интервенции. Шпанец беше најефикасен и кај Нант, крилото Валеро Ривера постигна шест гола, а четири пат меѓу стрелците се запиша и Рок Овничек. Голманот Олсен собра десет интервенции.
По неполни 24 коло Нант е и натаму второпласиран со 37 бода, еден повеќе од Екс Прованс и четири од Монпелје. Во вторник екипата на Нант гостува во Магдебург во четвртфиналето на ЕХФ Лига Европа. Првиот натпревар заврши со победа од три гола разлика за лидерот во Бундеслигата.