Лазаров ја собра репрезентацијата за мундијалскиот бараж против Чешка

Вечерва во хотелoт „Александар Палас" во Скопје се собра најдобрата машка селекција за престојниот мундијалски бараж натпревар против Чешка. Откако во првата рунда од плеј-офот, нашите ракометари ја минаа Романија, сега последна пречка пред нов настап на Светското првенство што следната година ќе се одржи во Полска и Шведска е селекцијата на Чешка.

На последниот список на селекторот Кирил Лазаров има 23 ракометари, но на денешниот собир ќе недостасуваат неколкумина наши интернационалци кои имаат обврски со своите екипи, а тимот би требало да се комплетира во понеделник.

Ракометарите ќе се подготвуваат во салата во Автокоманда и во СЦ „Борис Трајковски" каде на 17 април (недела), ќе се игра реванш дуелот, додека првиот натпревар што ќе се игра во Злин, на програмата е во среда (13 април) со почеток од 19:15 часот.