Нант во позитивна серија, победен Истр за шеста радост по ред
Истр - Нант 26:33 (12:13)
Четвртфиналистот на Лигата на шампионите, француски Нант ја продолжи победничката серија во домашното првенство, откако попладнево го совлада Истр со 26:33 (12:13) за шести триумф по ред во натпревар за бодови. Аутсајдерот Истр одигра солидни 30 минути, во кои не се предаваше против Нант и на полувремето замина со 12:13, но во вториот дел ситуацијата драстично се промени.
Нант ја презема контролата врз резултатот во вториот дел и на крајот извојува триумф од убедливи 26:33.
Македонскиот капитен Кирил Лазаров постигна еден погодок, но одлично проигруваше до соиграчите. Нант во своите редови ги имаше расположените Ривера (седум гола) и Монар (пет гола).
Следен предизвик за Нант и Лазаров во домашниот шампионат е тимот на Лимож, но пред тој меч, веќе в четврток ги чека реванш средбата од четвртфиналето на Лигата на шампионите против Веспрем.