Нант и „XXL Арена“ испратија кандидатура за Ф4 турнирот на ЕХФ Купот
Францускиот клуб Нант достави кандидатура за организација за завршниот турнир на ЕХФ Купот на 23 и 24 мај 2020 година. Клубот каде што настапува македонскиот репрезентативец Кирил Лазаров аплицираше во предвидениот рок и заедно со бундеслигашот Фуксе Берлин ќе се бори да го добие „фајнал-фор" турнирот.
Во 2013 и 2016 година Нант беше организатор на завршниот турнир на ЕХФ Купот, но тогаш натпреварите се играа во помала сала, за разлика од понудата за сезонава, кога се предвидуваат натпревари во „XXL Арена". Капацитетот на оваа сала е 20.000 гледачи и Нант има шанса да организира завршен турнир на вториот по квалитет Куп на нивото на Лигата на шампионите.
Победникот на ова натпреварување ќе ја претставува Европа на ИХФ Суперглоб, натпреварување со кое се отвора новата сезона.