Нант ги започна подготовките со новиот тренер Алберто Ентрериос
Кирил Лазаров ја започна новата сезона во француски Нант. Третиот почеток во Нант за нашиот репрезентативен капитен е посебен, бидејќи првпат Нант ќе се потпре на нов тренер во последната деценија. На местото на Тјери Анти, нов предводник на Нант е Алберто Ентрериос. Шпанецот до минатата сезона беше „десна рака" на Анти, а сега почнува самостојна кариера.
Нант во наредната сезона ќе се натпреварува во францускиот шампионат и во ЕХФ-Купот. Веднаш ракометарите заминаа на подготовките кои ќе траат неполна недела, а предвидени се два подготвителни турнири.
Со видоизменет тим Нант ќе се обиде да им парира на ПСЖ и Монпелје кои завршија на првите две позиции минатата сезона.