Репрезентацијата се собра за двомечот против Исланд
Ракометната репрезентација на Македонија ги започна подготовките за двата натпревари против Исланд во квалификациите за ЕП 2020. Новиот селектор Данило Брестовац има цел да го поправи впечатокот од воведните два натпревари, особено по поразот во Грција, што претставува еден од најтешките во историјата на ракометната репрезентација. Брестовац ќе се потпре на претходните искуства на репрезентативците со мал фокус на дефанзивата.
Капитенот Кирил Лазаров свесен за новите предизвици, очекува тешки дуели со Исланд во обид за враќање на победничкиот дух и атмосферата во Националниот тим.
„Добро се познаваме и ќе немаме многу промени, иако имаме нов селектор. Клучно според мене е да создаваме победнички менталитет, нешто што ќе го пренесеме и врз младите играчи што се дел од овој национален тим. Очекувам добри натпревари, се надевам дека ќе освоиме најмалку еден бод со кој би направиле значаен чекор напред кон пласманот на ова ЕП", рече капитенот Лазаров.
Последното сеќавање со Исланд носи лоши спомени – тесен пораз на СП во Минхен, иако водевме во поголемиот дел од натпреварот.
ФОТО: Филип Вирановски
www.gol.mk