Нант поразен во Париз, шампионот побегна на врвот на табелата
ПСЖ – Нант 34:29 (19:13)
Супер-дербито од 17. коло на францускиот шампионат им припадна на лидерите, ракометарите на ПСЖ, кои во главниот град го надиграа Нант со 34:29 (19:13).
Дуелот започна фуриозно, двата напади беа феноменални и се наметнаа пред одбраните. Сепак, во централниот делна полувремето се разиграа Степанчиќ и Сагосен и шампионот се одлепи на +5. Со тајм-аут Анти се обиде да го прекине ритамот, но „светците" беа поумешни и на одмор заминаа со 19:13. Лазаров и Ниокас беа единствените кои им парираа на домаќините во првиот дел.
Одлуката околу победникот беше решена на почетокот од вториот дел. Омејер бранеше одлично (14 одбрани), Степанчиќ постигна уште неколку гола преку блокот на гостите и веќе беше +8. Ракометарите на Нант често грешеа и Генсхајмер со лесни голови од контра во 49. минута предноста ја зголеми на +11 (33:22). Гостите голови постигнуваа само од позицијата на десен бек, каде што Лазаров и Гурбиндо заедно реализираа десет погодоци.
Искусна екипа како ПСЖ лесно го приведе натпреварот кон крај и во петтиот дуел оваа сезона најлесно го совлада Нант со 34:29.
Најефикасни поединци во екипата на ПСЖ беа Степанчиќ со девет, Сагосен со шест и Генсхајмер со пет гола, а кај Нант се истакнаа Гурбиндо и Кирил Лазаров со по пет гола. Засилувањето на голот Бонефои запиша девет интервенции. Првакот сега има пет бода повеќе од второпласираниот Монпелје и шест повеќе од Нант, кој се наоѓа на третата позиција.