Раул Гонзалез е новиот селектор на македонската репрезентација

Шпанецот Раул Гонзалез денес беше официјално претставен пред медиумите како нов селектор на сениорската репрезентација на Македонија. Тренерот на Вардар, на прес-конференцијата што се одржа во просториите на РФМ, ги соопшти првите планови и очекувања за наредниот период во кој фокусот ќе биде ставен на натпреварите од Квалификациите за ЕП 2018 против селекцијата на Исланд.

„Горд сум што ќе бидам селектор на Македонија. Веднаш ќе почнеме со работа и јас ќе се вложам максимално, како и секогаш. Мислам дека вклопувањето нема да биде тешко поради тоа што сум тука, во Скопје. Ги знам македонските играчи, сакам во наредниот период да поразговарам со сите посебно и верувам дека ќе се подготвиме добро за предизвикот кој не очекува", истакна Раул Гонзалез.

Шпанецот на селекторската позиција на Сениорската репрезентација на Македонија го наследува Лино Червар. Одлуката Раул Гонзалез да биде нов селектор на репрезентацијата беше потврдена на денешниот состанок на Управниот Одбор на РФМ. Раул Гонзалез ќе дебитира на клупата на Македонската репрезентација на 4 мај во Скопје, на првиот од двата натпревари против Исланд во рамки на Квалификациите за ЕП 2018 година. Втората средба против Исланд ќе се игра само три дена подоцна, на 7 мај, во Рејкјавик.