ВИДЕО: Кил ја продолжи „жетвата„ на трофеи во германскиот ракомет

Кил го освои германскиот Супер куп и продолжи со „жетвата„ на трофеи во Германскиот ракомет. Во мечот за титулата во „Порше Арената„ во Штутгарт, „зебрите„ го совладаа Куп победникот Флензбург со 27:26 (12:14) и ја освоија деветата титула во ова натпреварување. Јунак на првакот на Германија беше токму бившиот ракометар на Флензбург, Штефан Вајнхолд кој со гол во последната секунда, го направи Кил победник во неизвесното финале.

Победничкиот пехар го подигна новиот капитен на Кил, Рене Тофт Хансен, кој ја наследи капитенската лента по преселбата на Филип Јиха во Барселона. Шампионатот на Германија почнува в сабота, а Кил веќе седум години е првак во најсилната лига во светот.