Македонија ја урна Црна Гора и визира пат за Вараждин

Црна Гора – Македонија 28:29 (16:15)

Македонија ја забележа и втората победа на Европското првенство во Хрватска и првпат едно големо натпреварување почна со две победи. Вечерва во „Арена" падна Црна Гора со 28:29 (16:15).

Македонија одлично го почна натпреварот, Талески и Лазаров ги постигнаа првите два гола и тоа можеше да значи добра најава за нашите момци. Но, следеше сосема поинаква Црна Гора, која играше брзо и полетно и го имаше расположениот Стефан Чавор, кој ни даде пет гола.

При 8:5 селекторот Раул Гонзалез повика минута одмор, па следеше македонската реакција. Со серија 4:1, цепелин на Лазаров и Талески и гол на Манасков, Македонија се врати во егал-финиш (10:10). Сепак, во финишот следеа серија на грешки, две исклучувања по ред во нашиот табор и Црногорците на одмор заминаа со 16:15. Во првото полувреме двајцата голмани одбранија само по четири топки.

На почетокот од вториот дел Митревски застана на голот на местото на Борко Ристовски. Но, нашите технички грешки се редеа и Црна Гора го одржуваше минималното водство. Следеше супер-позитивен момент на нашиот тим, одлична игра во одбрана и Филип Кузмановски и Дејан Манасков донесоа пресврт. Македонија поведе со 19:21 на средина од вториот дел и Ѓукиќ побара минута одмор.

Поради недисциплина следеа две минути за клупата на Црна Гора, а бројчаната предност ја искористи Македонија и поведе со 20:24, највисока позитива на средбата, но следеа две промашувања на Георгиевски, кои Црна Гора ги казни и се врати на 24:26. Позитивата од два гола се држеше и на три минути пред крајот (26:28) и истата остана до финишот, пред се поради клучната одбрана на Борко Ристовски на една минута пред крајот. Пред самиот финиш на мечот, поразот на Црна Гора стана минимална.

Најдобар меѓу стрелците беше Филип Кузмановски, со пет гола, а го следеа Манасков, Лазаров и Миркуловски со по четири гола. Кај Црна Гора, Чавор даде шест гола, а Вујовиќ заврши со пет.